經歷詳述:
已經係第二次嚟睇馬醫生，眼睛本身冇咩大病所以兩三年先打算檢查一次，三年前第一次膽粗粗去驗眼，覺得佢好好、價錢又十分抵，所以之後都唔會轉眼科醫生㗎喇（除非佢退休T_T）。今次因為眼睛紅根暴現同極乾澀，好驚眼睛有咩問題所以嚟睇眼。

馬醫生係一位超好超nice嘅醫生，我問嘅嘢佢都會好詳細咁樣同我解釋，其實嗰日出面好多人排隊候症，正常醫生應該會好急急腳咁樣睇症，但係馬醫生唔會chur，仲好有耐心咁同你講唔同嘅護眼方法同比建議你，唔止係眼科知識，仲會分享唔同嘅養生方法，感覺自己好似上咗一課咁，佢唔會有高高在上嗰種架子，但佢嘅專業、智慧同親切係會令人敬佩！

睇症後，除咗滴眼藥水之外更開始改善自己嘅生活作息，本身紅咗兩個禮拜嘅眼睛好快就變返白淨。醫者父母心，佢係一個絕對為病人好嘅醫生（唔單止係眼睛）！真係好好好好好多謝馬醫生！！
簡評:
個人觀感- 詳盡親切、耐心施診
經歷過程- 醫生會清晰明確的講解其病情
推介意見- 已視為本人的必然選擇