困擾多年的精神問題

病患者男 - 19歲

小弟有精神問題困擾，已困擾數年而且有惡化跡象，今日終於鼓起勇氣請教。

小弟自小已經常常因不小心/”論盡”而犯錯，唔見嘢跌爛嘢唔記得嘢都已經係家常便飯。我亦有時會喺人哋講緊嘢嘅時候發夢/遊魂，聽唔明instruction要聽多幾次先明，小學有時玩遊戲/PE堂嘅時候都因為唔明老師/同學嘅指令而呆咗喺度，所以我極害怕需要多人互動嘅活動。除此之外，我初小嗰陣都有見過言語治療師，大概係因為聯想力差、咬字不清同埋表達能力差咁(小學中文oral經常拎C/C+)。好自然咁，我由細到大都極怕羞怕事且無自信，朋友唔多，而就算同朋友幾熟都好，講嘢時都會成日deadair搵唔到話題。

到大槪中二中三開始我發現自己精神狀態越嚟越差而且有lazy eyes(唔知關唔關事)，原因不明。慢慢開始覺得成日都好攰、無活力、瞓夠8個鐘都係咁，而上段講到嘅所有徵狀都越嚟越嚴重，但因中學始終著重試卷操題依啲勤力就高分嘅考核方式，中學成績唔差(除咗中文)，故亦無太重視自己嘅精神問題。

但上到大學因為practical/lab 佔比多咗好多，而我就因為成日唔明instruction+心不在焉而唔知做乜、失好多分，有次上practical更被professor當住十幾人面前鬧我，此外好多presentation 去到Q/A session都會因為聽唔明問題/聽到一半遊咗魂而唔識答、呆咗喺度要partner幫手。

除咗學業之外，我自己就算喺屋企都好難搵到一件自己可以專注幾個鐘頭嘅事嚟做，成日做緊A嘅時候就會走咗去做B，上一刻諗住做嘅事下一秒就唔記得咗，最後不知不覺浪費咗一日，自己亦會因為浪費咗時間而覺得沮喪唔開心。社交方面，小弟本身不善社交，現在有時中學同學約見面，心裏雖然想去但亦會因怕出醜而唔去，大學同學又無法融入圈子，嚟嚟去去都係見嗰幾個相熟嘅朋友，故經常都會覺得孤獨同悶。依家嘅我感覺好似活死人咁，日日都無所事事，唔知自己做緊啲乜，亦睇唔見將來，睇見同學嘅生活多姿多彩，自己又羨慕又失落。

我自覺自己有社交障礙，但依個社交障礙都應該係衍生出嚟嘅共病嚟嘅，而本身嘅精神問題我搵極都唔知係咩病，有諗過會唔會係ADHD-i(好多symptom都中)，但有幾樣嘢同ADHD嘅人有唔同。第一，ADHD病人通常成績都較差，但我成績一直唔算差(至少可以一take入U)。第二，ADHD病人通常想像力較豐富，但我聯想力差而且0創作力，諗個作文題目可以諗半日都未諗到。第三，ADHD嘅徵狀應唔會隨時間惡化吧。第四，ADHD嘅人應該有用唔盡的活力，但我唔係咁，自中學開始仲要成日都好累無活力。

以上長文，想請教下醫生我究竟係咩事? 希望能夠找專科醫生解決問題。

陳蔓蕾醫生回覆:
10/11/2020

你好，

根據你的描述，你可能是患有專注力失調過度活躍症（ADHD，Attention deficit hyperactivity disorder)。

很多人都唔會ADHD成績一定會差。ADHD其實只是專注力失調，並沒有說患者智力低下。事實上ADHD和智商有一點關係，但也不是絕對。有很多患者其實智商很高，甚至是資優生，只是無法集中精神讀書而已。

就好像一部車子，它的引擎馬力很大，但是卻載付很重的重量，那麼，車子還會開得快嗎？那樣就要看究竟車子的引擎能否戰勝車上的負載重量了。

如果患者智商很高，學習時只需看一眼便懂，那麼便不需要太長集中精神的時間也能夠考到理想的成績。如果患者智商平庸，需要很長的時間才能明白學習的事情，那麼便要集中精神較長的時間才能考到理想的成績。

閣下能夠一次考到大學，證明你的智商是比較高， ADHD只是把你的潛能坐低，令你的智商無法盡情發揮而已。

第二， ADHD病人並不是聯想力特別豐富，只是他們的思想很飄忽，東拉西扯無法集中在同一件事情上面思考而已，並不代表他們想像力特別豐富。

第三， ADHD大多數情形下，應該隨着時間有改善才對。因為大腦發展會慢慢學習到專注的能力，因此，同一個病人身上比較，他成年的專注力應該會比童年時為高。可是為什麼仍然覺得專注力好像比以前差呢？原因是社會對小學生專注力的期望比成年人為低，亦會因應小學生的專注力長短而設計課程。但是到了成年大學時期，課程設計亦會期望學生是成年人的專注水平。雖說成年的患者專注力比童年時好，但是增強了的專注力也不一定能夠追上課程的增長，因此可能逐漸無法追上同齡的學習期望。再加上ADHD病人不斷遇到無數困難，時間長了很容易會產生其他併發症，例如焦慮症抑鬱症等等，這些病症也會拖慢腦部思考，令學習越來越困難。

第四，ADHD患者是自己已經有足夠的活動，但是感覺還未足夠，因此，才勉強自己的身體繼續活動。這並不代表身體比其他人更多活力。其實由於消耗更多體力，有時會比正常人更疲累。

希望能夠解答到你的問題。

謝謝

陳醫生

以上資料只供參考，不能作診症用途，
請與家庭醫生查詢並作出適合治療。
如有身體不適請即求診，切勿延誤治療。
若資料有所漏誤，本網及相關資料提供者恕不負責。