經歷詳述:
醫生無心聽病人講述病情，回應病人寸寸拱，我話尋日開始唔舒服，佢搶答: "即係10號晚啦！". 佢問我尋日痾咗幾多次，我就即場數: 早上一次、中午一次、半夜一次(我沒事先數過，所以都係即場回想返，數返出嚟。而且我唔知半夜果次算即日還是第二日，所以想講清楚俾佢知)，佢就寸我: 我問你幾多次，你又答唔出幾多次！"。又話我講嘢唔講重點！！！如果診症嘅互動只係簡略帶過就算，仲算唔算合格嘅診症？

到佢解釋病情，態度係正常返嘅。十分循循善誘叮囑我要戒口。但當病人發問，佢就開始唔耐煩，發老脾話已經解釋咗，仲話："我頭先已經解釋咗，你咁都聽唔明?"。其實我係想講我不嬲都有痛開，唔知有無大問題，亦唔知同今次病有無關，所以想問埋。佢就話:"今次還今次！今次嘅病我已經解釋咗！". 嘩，咁都得？！即係每次睇佢只可以睇一單病例？想問其他嘢，係咪要重新登記睇多一次？

佢是一點耐性都沒有，解釋完、講完佢要講嘅嘢，病人就要立刻離開診症房。防止病人 “順便問埋” 其他問題。佢一路發老脾，旁邊護事就會做醜人，幫忙趕病人出去：“得㗎喇，唔好唔開心喇，出返去先啦，出去等攞藥。” (個護士真係叫我 "唔好唔開心" 嘅，可想而知個醫生鬧得我幾勁!!)

其實睇完佢我都唔知我係咩事？睇完佢之後，我無食佢嘅藥，同一日，我去了佢隔離診所(丁醫生) 睇多一次，人地丁醫生解釋得不知幾詳細，慢慢聽我講，然後佢慢慢解釋。原來我平日都痛是可大可小的，佢叫我觀察下，再痛得嚴重/頻密，就要返去睇佢，等佢寫紙俾我驗身。

睇完李醫生之後，我嘅感想就係: CLS!!

簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧