經歷詳述:
當日我朝早一早起身就四肢異常無力,舉起隻手或行步路都覺得好困難,而且一直想嘔同好暈. 見呢間最近屋企,所以去左睇, 我當時係用公司醫療卡求診.
李堯庚醫生問我有咩唔舒服,我照直講. 佢聽完我講 就話咁你拎醫療卡黎睇病,無力唔係病黎 呢張紙冇一格係可以剔無力/攰個格(CLAIM醫療個張FORM 有格剔番病人症狀) 咁我比病假你 都冇可能係張醫生紙度寫比你老世睇話因為你攰所以比病假你嫁? 咁我解釋話 我今朝一起身真係已經全身冇哂力 係連行一步都覺得好辛苦個種! 唔係眼訓唔想起身唔係攰唔想番工! (我當時已經覺得非常委屈喊左出黎)
但佢已經唔再聽我解釋 一口咬定我係詐病,仲話我係幫你既 咁你都要話我知你有咩病先得嫁係咪?
最後我屈服俾佢誘導我講一D普通症狀出黎.同埋求其開左D止暈止嘔同維他命比我,話維他命係等我身體冇咁攰.(我係配藥姑娘面前又喊左出黎,因為我真係覺得好侮辱!)

作係一個病人而言,我覺得呢種不被信任既感覺令我好唔舒服,同埋呢位醫生根本就無問清楚我既病症就斷定我詐病,我覺得好無助,好委屈,好無辜! 其實我如果要詐病要呃病假,我直接講我肚痛係咁柯又或者係琴晚係咁嘔呢D 已經可以啦係咪先???再者拎醫療卡去睇醫生係有咩問題呢?佢似乎好強調我係用醫療卡黎睇,仲問我係番咩工...用醫療卡黎睇病就係詐病呃假紙?用醫療卡睇病係乞衣???
簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧