經歷詳述:
一開始致電查詢，接聽姑娘態度已經好差。今次持醫療卡睇醫生，登記時已經同姑娘講左係腸胃炎，姑娘告知要等十幾個，然後就係一副好唔情願接症既樣，仲細細聲話呢期咁多都係腸胃炎。咁都無辦法啦，唔舒服就係要睇醫生要等嫁啦，點知室內環境焗促好似無開冷氣咁。期間有一兩個客人番返黎問個姑娘洗唔洗登記番，姑娘都用好唔友善既態度，無禮貌地回覆！因為空間唔多，坐既位已經滿哂，另外有一客人問可唔可以喺出邊等，點知個姑娘就話”我得一個人出唔到黎叫你”，所以我都唔敢出去等。

點知等等下突然間嘔，我已經成個口罩都係嘔吐物好狼狽。期間有其他客人諗住推個垃圾桶比我，點知個姑娘話番果個客人轉頭，話唔可以嘔落佢個垃圾桶度。之後佢就攞左個垃圾袋比我，示意我自己執番，用極鄙視嘅眼神望住我，仲同我講”你嘔就出聲呀嘛，又唔係小朋友，小朋友就話姐”。我已經自己清理哂地下既嘔吐物，然後終於等到睇醫生，經過個姑娘房個姑娘又係睥住我。點知陳醫生話要收番清潔費，我就問清潔費幾多同埋我已經清理哂，佢就話姑娘一陣會同我講。

之後姑娘話清潔費$80，其實個刻完全覺得唔係錢既問題，係我覺得作為病人黎講，我唔覺得診所職員有當我係病人咁看待。嘔完有菌要付清潔費我明既，但個姑娘理都無理過又無清理，作為診所職員唔係應該要負責保持環境清潔？

陳醫生仲話”如果唔比清潔費的話，我地有權唔收你醫療卡”，其實你地咁唔想收醫療卡就唔好話可以用啦！真係好差既體驗，如果大家去呢間診所記得唔好用醫療卡，佢地會當你乞丐咁看待！見到呢一位周姑娘對於付診金同拎醫療卡既病人，待遇完全不同。呢位周姑娘態度真係好有問題，真係建議大家唔好去呢間診所！

藥物方面，我腸胃炎加有啲發燒，醫生居然只係開左止痾止嘔藥比我，退燒藥都無！

簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧