經歷詳述:
有「巴氏腺囊腫」已經有個多星期，以前從未患過，今星期一曾去過社區普通科醫生睇過，食咗止痛藥同抗生素，不但冇好轉，而且腫脹越來越大，由最初一粒波子，變成一隻雞蛋嘅大細，實吉吉，每行一步路都好痛，坐立不安，最慘係搭港鐵嘅時候冇位坐，呢個係富貴病，因為只有躺平先至係最舒服。

喺網上爬文，發現有一名女西醫鄧䁱彤醫生係專門負責婦科疾病，而且亦包括接生bb，再睇醫生詳細介紹同埋其他病人評語之後，決定一試，因為呢位醫生嘅收費，同其他clinic或醫院做局部麻醉比較，鄧醫生係全香港最平，贏盡全香港，依個係當時我臨時臨急做嘅 research。

由於我遲到關係，前台職員已經好黑面，絕對唔會有笑容，說話冷淡，絕冇尾音，填完一份三頁紙嘅表格交出身份證後，坐低叫名，等咗大約10分鐘就輪到我，但係懶理得理佢最緊要醫生醫術高明。入到去診症室，除咗醫生之外，仲有一位助護，助護同樣係面黑，對醫生亦不太友善，第一時間同醫生say sorry我遲到，之後交相轉介信，醫生叫我瞓上床，一睇就知道係呢個病，並且講會立即做手術，我已經同醫生講我好怕痛，請佢落足麻醉藥，我聽到佢同個助護講話5mg，咁我唔知呢個份量係唔係足夠，心諗只有靠晒呢位醫生，醫生係打針之前都有講明，就算打咗麻醉針，都會有感覺，會有少少痛，但係唔太強烈，俾咗個心理準備我。

開始打針之前，我就聽住音樂，請醫生千祈唔好同我交代下一步做啲乜嘢，因為我實在太驚，打麻醉針係好痛嘅，因為打喺下體近腫瘤位置，而且呢啲不見天位，諗吓都知係有幾痛，大約過咗10多秒，醫生就手起刀落，我係冇乜嘢感覺嘅，就算醫生用刀介開個腫瘤，都唔痛，醫生用盡力將腫瘤入邊嘅膿推出嚟，我感覺到有一股熱流流出，亦都聞到一股臭雞蛋味，知道已經介左一刀，打開咗個腫瘤，醫生會推一次膿，就會先縫一針，一縫針，就痛到飛起，因為我會有感覺，而且醫生手持嗰支針，好似吉到我其他肉，我不得不嗌咗出嚟，過程大約20至25分鐘，最痛係接近完成階段，我係痛到流眼淚，而且嗌出聲，但係助護都只係幫我抹血，唔會幫我抹眼淚，我懷疑麻醉藥落得份量唔足夠，除此之外，醫生手勢好好，好快完成晒整個階段，而且醫生人靚聲甜，和藹可親，笑容可掬，解釋得非常詳細，只係略嫌麻醉藥落得唔夠份量姐，最後醫生話會攞啲膿去化驗，睇吓係乜嘢菌，同埋而家介左一刀之後會有血流出嚟，但係唔使驚，會流流下冇㗎喇。

總括而言，我係相信同埋喜歡鄧醫生嘅，因為佢手勢好好，好專業同有同理心，而且價錢唔貴，但係下次，我講如果有機會的話，麻醉藥一定要落多啲。

簡評:
個人觀感- 詳盡親切、耐心施診
經歷過程- 醫生會清晰明確的講解其病情
推介意見- 已視為本人的必然選擇