經歷詳述:
有兩段經歷：
第一次，本人：九月二十六日去洗牙，以前有箍過牙（戴透明牙套）。唔洗唔知道，一洗嚇一跳，有4隻大牙蛀咗。醫生告知爛得唔算深，問我想觀察住先，定補牙，我選擇馬上補牙，但無帶夠現金，問可否電子支付？醫生話唔急，最緊要整返好你隻牙先。我當堂覺感動同窩心，醫生唔係以錢行先，呢個世代少有。當然補完牙後我馬上落去㩒錢。補牙期間醫生有提我可能會有啲「冤」，有照顧病人感受，但其實我完全無感覺，總嘅嚟講醫生手勢又好又快，又可以解釋清楚我嘅情況同疑慮。

第二次，我6歲的兒子：十一月七日去檢查牙齒，因為小朋友話大牙有啲牙痛，肉眼都可以睇到黑色，醫生解釋兩種可能出現嘅情況，幸好最後確定無須杜牙根，成個過程我陪住，見到醫生溫柔、細心、有耐性。事後我問兒子感覺如何，佢原話係：「一啲都唔痛，又快又好。我覺得醫生好似爸爸。」我笑咗出嚟，望着兒子，摸下佢個頭，讚佢好配合，令到補牙非常順利。

感恩遇到好醫生！！另外姑娘也友善！

簡評:
個人觀感- 仁心仁術、醫德高尚
經歷過程- 醫生會從病人出發去提供意見
推介意見- 已視為本人的必然選擇