經歷詳述:
上年七月身體檢查,發現乳房有瘤,呢位陳醫生話應該係良性,但個shape唔係好靚, 仲有陰影。八月,佢幫我抽幼針,無抽粗針,報告顯示良性,但同時註明結果存在唔少不確定性。

當時陳醫生沒有再抽針再檢查,只係建議做手術,我問左一句係唔係一定要依家做,可否聖誕假期做,轉個頭姑娘打黎話可以等多四個月。

於是我響十二月再去照超聲波, 個陣陳醫生話個瘤既shape都係唔靚,要月尾做手術,但仍然無再抽針檢查個瘤係良性定惡性。

十二月底做左第一次手術,做完陳醫生都無話有問題,我於是開心返屋企。點知幾日後,手術既組織化驗報告出黎,話個瘤係惡性。無癌變有癌。我晴天霹靂。

於是陳醫生就叫我響今年既一月,即兩個禮拜後, 做第二次手術, 割埋近癌細胞發現位置既乳管,同埋驗淋巴。第二次手術進行之前,要打同位素黎驗淋巴。因為第一次手術既傷口未好,要遞高隻手,痛到我死去活來。

第二次手術期間,即時化驗結果話淋巴無事,於是除左額外既乳管組織同埋挑出黎既前哨淋巴,就咩都無割到。我就咁涯左第二刀。要接受兩次全身麻醉。

第二次手術後,陳醫生同我屋企人講話已經徹底清除癌細胞,病人以為終能釋懷。點知響之後既詳細顯微鏡觀測下,發現淋巴原來都有輕微擴散。額外割既乳管反而發現唔到癌細胞。

另外, 陳醫生響手術第二日就將掛響我腋下,用黎收集淋巴液既樽拔走,簽我出院。我之後液下積水,傷口腫左,抽左兩次水都未搞掂,情況持續至今。。。

另外,陳醫生解釋報告好求其。終極報告出爐後,我問佢係乳癌第幾期,佢話你應該係一至二期,安全起見可以當自己係第二期,但經徵詢腫瘤科,發現原來只係一期A。我響睇腫瘤科同自己上網查證之前,都淨係知道自己中左乳癌, 咩 T1, N1min, N0, grade 2, 通通都唔知, 陳醫生都無解釋清楚, 淨係識話有d瘤好難判斷。大佬,如果咁易就判斷到就唔使搵醫生你啦。。。

簡評:
個人觀感- 有欠詳盡、耽誤病情
經歷過程- 需要自己主動提出較多的諮詢
推介意見- 本人絕對不會再作光顧