經歷詳述:
你大家好，范醫生係經由我一位朋友介紹嘅。我今年39歲，得知有依個子宮肌腺症已有3年，但係自從中一開始已有經痛，一路到結婚生小朋友，正係痛頭一日個4，5個鐘。不過响3年前，我每次黎M，都係劇痛，而且痛足2日！要靠止痛藥食足2日！我亦睇咗幾個私家醫生同好幾個政府醫生，佢地話我有：
子宮肌腺症
子宮內膜異位症
子宮壁增新
子宮後屈
但係近依幾個月，我M一黎，竟然加長咗，足痛咗我3日，那種痛法仲痛過生仔 （真架）
雙手一路標冷汗，背脊亦出汗，子宮狅痛，腰又痛，就連肛門都痛埋潻⋯⋯食止痛藥已經食到冇哂效每次黎痛到我大减。每月又要請3日M假，响屋企受苦而唔係休息😞😞
直至到今年11月，有個朋友介紹咗一位X醫生比我，照咗超聲波話我有子宮腺肌瘤同埋朱古力瘤，依位X醫生建議我開刀割全子宮，當時我聽完好驚，心跳加速，我問佢做微創得嗎？佢話有風險，時間長達3個鐘同埋怕刮唔哂d朱古力瘤，如果開刀就快靚正，1個鐘搞掂。當時我唔想再受經痛嘅日子，所以決定比X醫生做（開刀）約咗2星期之後做。可惜我响依2個星期內，晚晚訓得唔好，又扎醒，發噩夢，冇胃口，每日只食一餐，日日心跳加速去到94！人明顯瘦咗好多。手術當日，我發覺自己個胃好似比火燒咁，好唔舒服，結果冇去做手術，反而睇咗普通科門診醫生，佢話我太緊張令到胃酸倒留，唉，雖然我當時鬆一口氣唔洗做手術，但係我始終要面對經痛依個問題，之後我又經過另外一個朋友將范醫生介紹咗比我，電話預約，book 咗2個禮拜，當我第一次見到范醫生嘅時候，佢比我嘅感覺係好可靠，我個心係好平伏，佢同我照子宮時，好有耐心同我一一分晰，d片照咗5張咁多！最後我問佢可唔可以做到微創將我全子宮切除？佢話哽係可以啦。我當時聽完佢講E句說話之後，我開心到笑咗出黎，佢話2個禮拜後，即今日，12月31號有位比我，佢話我好彩，原本有人book 咗但取消咗，如果唔係我最快都要等到出年3月頭。范醫生用咗足足1小時為我解答問題，而當時仲有4個客等緊佢睇症。佢個人好客氣，成日話（唔好意思）
佢講野好有説服力，做野好有把握，我聽完佢所講嘅野，我對佢超有信心！
12月30號 6：00 pm 我入咗法國醫院，第二日早上即31號，9：15分范醫生入咗黎我個病房，講話今次手術會做d乜野，之後我問佢，點解有一part 佢寫咗或者會開刀？佢話（因為有時到最後都話唔埋，不過你放心，我好肯定99.9 % 我係會同你做到微創，今年我已做咗話要做微創嘅人，冇一個臨尾要開刀，而你個情況亦唔係難，更難嘅0個個我都做到微創。同埋如果我發現你個子宮牽埋其他野，我都會幫你搞埋，因為我係想醫好你）聽完佢講，我即刻放鬆哂 😊 到咗10:00入咗手術室，個個醫護人員對我都好好，問我凍唔凍？我話凍，佢地即刻拎咗個迷你暖風機吹住我個身。我當時有幾聲咳，范醫生笑笑口話佢都有咳架，仲係咳咗成15年添，哈哈佢真係好風趣，唔會擺任何架子😄 范醫生10：30開始為我做手術，當我做完成個手術已經係1：30，我昏昏迷迷0個陣，范醫生話（手術好成功，全程用微創，唔洗開刀）之後佢去咗接第二個 case. 到咗4:30 佢過黎見一見我，我當時即刻握著佢個左手講聲（我真係好多謝你呀范醫生，你實在太叻啦！） 佢笑笑口，之後拎咗d片比我，同我解釋頭先做微創見到我個子宮係痴住左我條腸，佢已好小心幫我割咗子宮，因為個部分要好小心所以用多咗半個鐘。我話好彩係范醫生幫我做手術，佢話如果唔識割，會整穿條腸，到時要（攬袋）😖
Anyway 手術後，我只 feel 到肚臍個傷口有小小痛，其他2個傷口冇痛，同埋我依家仲有精神响度同大家分享我嘅經歴，范醫生真係一個好好嘅醫生！
好有説服力，好有耐性／好清楚為你解答每一條問題，好風趣，絕不擺架子，主動探索其它病因。

簡評:
個人觀感- 醫術精湛、鉅細無遺
經歷過程- 醫生會主動探索其病因及治療
推介意見- 已視為本人的必然選擇