經歷詳述:
連續三個月非經期陰道出血，本身已經好驚好擔心。
佢係我份保險網絡醫生，三年前睇過佢都好地地，所以先搵返佢，不過好失望。嗰陣佢仲一間醫療中心入面做，而家自己開診所完全冇晒醫德。一入到診所已經feel到d姑娘態度麻麻，坐喺度等候見到每個病人見醫生時間好短。keep 住5-10分鐘入⼀個。入到醫生房就覺得醫生姑娘都好似好趕時間。個醫生係咁冷笑，解釋病情好似急口令咁，講得好快，又唔清楚。想追問清楚，又好冷淡好唔情願答你，又悔氣又冇耐性，皺晒眉頭好炆憎。完全唔係專業態度。目中無人。人哋要做手術已經好唔開心好緊張，又唔俾問多兩句。俾個價目表我，叫我出面考慮吓。
考慮完想Book期入院，然後俾張醫療咭姑娘，姑娘話你而家先攞出嚟，姑娘攞入去俾醫生睇完出返嚟就同我講，醫生話以前有病人用過呢張醫療咭批得唔多錢，所以唔做你手術。問我有冇第二張醫療咭或者搵其他保險網絡醫生。個姑娘仲黐線，醫生寫俾我係做微創子宮肌瘤手術，姑娘叫我考慮選擇傳統開刀，價錢平啲。真係唔係人講嘅說話。真係想問個姑娘，你不如攞個子宮俾我試吓開刀？
我張醫療咭係免找數full cover ，佢唔幫我交申請表俾保險公司審核嘅程序都冇，就拒絕咗我。我聽完即刻打俾保險公司，保險公司話呢個醫生操守好有問題，建議我可以寫信向保險公司舉報佢，等保險公司考慮唔好再同佢合作。
呢啲咁嘅醫生為咗賺錢，賺得少就唔做你，揀客嚟做，態度差，趕住睇晒啲症就求其打發你走，連良心都冇埋。診所姑娘都係一啲同情心都冇。希望更多人知道呢個醫生嘅惡行，唔好再睇佢。原來人可以變得咁醜陋！

簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧