純粹鼻炎?

病患者女 - 40歲

事源於我大概一個月多前（14/5）被傳染，跟住開始發燒去到38.6度，睇咗第一次私家醫生（17/5）未好返。跟住睇第二次私家醫生（20/5），食咗兩日藥之後開始眼睛發紅同埋敏感，眼睛有啲黃綠色黏液黏住咁。之後去咗排急症室（23/5）俾醫生照咗X光當時顯示肺部冇感染，前前後後做咗六合一快測三次都冇感染，最後醫生開咗啲敏感藥、滴眼、噴鼻藥俾我。之後都未好返睇咗第四次醫生（29/5，因為我本身對塵蟎敏感，有懷疑過會唔會係呢個原因引致連環效應）睇過敏免疫科，醫生懷疑我係鼻竇炎開咗五日藥同洗鼻水好咗少少但未好返。

到22/6我去咗睇耳鼻喉科。照咗第一次鼻鏡，顯示我左邊鼻有閉塞，導致眼水倒流，喉嚨好似卡住卡住咁。醫生話呢種係感冒後嘅鼻炎，唔係鼻竇炎唔需要做手術。

我當時嘅症狀大概係喉嚨好似發炎咁嘅感覺，唔似感冒但耐唔耐有幾聲咳，佢係好似喉嚨有少少嘢卡住卡住又發炎咁嘅感覺。跟住晚上瞓瞓吓覺會無啦啦流眼水然後醒咗，同埋眼睛一時時會覺得得痕，眼睛唔算腫。鼻又好似塞塞地。另外，唔知係咪之前咳得太多，我覺得左邊胸圍鋼絲位嗰個地方，有時郁吓會有少少扯住痛，呢個情況已持續兩星期直至現在，都入過急症室照過X光，冇顯示肋骨有斷裂或其他問題，有開到消炎藥俾我。

一星期後（28/6），去咗睇第二次耳鼻喉科。我有將上面嘅症狀再次提出，當時亦有做過第二次鼻鏡，當時醫生回答我指顯示鼻炎有改善開始有通道口，但不能確認有沒有感冒症狀。

而我依家目前嘅情況具體來說：

喉嚨：具體沒太大改變，仍處於一個「感覺裡面有點發炎的症狀」，裡面好似有啲痰卡住的感覺。

眼：第一日有好一點，之後又開始有流眼水。每晚都係會瞓着咗之後，左右兩邊眼會再留一次眼水。平均每天都總會有啲時間係癢癢的。

左邊鼻：有好一點，感覺有時塞塞地。會持續用洗鼻水。

左邊胸（胸圍鋼線位）深呼吸到底時/有時躺下轉身的時候，會有感覺一點點痛。平時呼吸沒大問題。有冇可能係之前咳得太厲害牽扯到嗰個位置覺得疼痛呢？但係呢個情況已持續兩星期，食咗消炎丸有好一啲，但係我唔確定具體係咩原因引致呢個情況。

醫生我想請教一下，而家咁嘅情況其實係咩原因呢？係純粹真係鼻炎引致喉嚨感覺發炎定有可能其他原因?因為已經一段時間了。
唔好意思唔該晒。